Европската комисија соопшти дека, и покрај ветото на Унгарија и Полска, го поддржува механизмот што го условува финансирањето од буџетот на ЕУ со владеењето на правото во земјите-членки.
Портпаролот на Европската комисија Ерик Мамер нагласи дека механизмот на кој се спротивставуваат Будимпешта и Варшава е во согласност со договорот на лидерите на ЕУ 27 од состанокот во јули.
– Механизмот е фокусиран на заштита на буџетот на ЕУ, обезбедува еднаква примена за сите, а мерките што евентуално би можеле да се преземат според овој механизам треба да бидат под надзор на Европскиот суд на правдата, рече Мамер.
Европската комисија додава дека Договорот за ЕУ предвидува опции во случај на недонесување на буџетот, но оти приоритет во работата сепак е спроведувањето на буџетот и фондот за обнова во најбрз можен рок, односно на почетокот на следната година.