Европската комисија е многу загрижена од информациите дека Австрија има намера да воведе построга контрола долж границата со Италија, изјави денеска на прес-конференција портпаролот на ЕК, Наташа Берто.
– Ако овие планови се применат ние ќе ги разгледаме многу сериозно, ќе ја процениме нивната неопходност и сразмерност. Таквите активности треба да се преземаат само во краен случај. Засега нема докази дека мигрантите свртуваат од Грција кон Италија, додаде таа.
Претходно денеска австрискиот министер за одбрана Ханс Петер Доскоцил појасни дека долж границата на неговата земја со Италија се предвидуваат мерки какви што беа преземени долж границата со Словенија, пред се, заради миграцискиот прилив.
Граничниот премин Бренер, на границата меѓу Австрија и Италија, има важно значење за движењето долж оската север-југ во Европа.