Пукотница се случи синоќа во бар во виенскиот кварт Отакринг, едно лице е убиено, а друго е тешко повредено и се бори за живот.
Напаѓачот и неговиот соучесник се во бегство, а полицијата започна опсежна потрага, пишува австрискиот „Кронен цајтунг“.
Инцидентот се случи околу 21:45 часот во турски ресторан на улицата Пајергасе. Според првичните информации, на сè претходела расправија, по што еден маж извади огнено оружје и испука неколку куршуми кон други двајца мажи.
Жртви на нападот се двајца мажи од чеченска националност. Едниот од нив почина на местото на настанот, наводно од прострелна рана во стомакот, додека другиот е пренесен во болница со повреди опасни по живот.
Мотивот за конфликтот сè уште не е познат.
Познаници на жртвите изјавија дека сторителот би можел да биде Србин, но истражителите веруваат дека станува збор за австриски државјанин со мигрантско потекло, пренесува Кронен.
Веднаш по пукањето, започната е голема потрага во неколку виенски области. Пошироката област околу местото на злосторството беше блокирана од безбедносни причини, а полициската акција траеше до доцна во ноќта.