Во серија напади во Ирак вчера загинаа 48 лица, а десетици се ранети низ целата земја, во пресрет на првата годишнина од повлекувањето на американските сили од Ирак.
Во експлозија на автомобил-бомба во северниот дел на Багдад загинаа 11 луѓе, а повредени се најмалку 40, изјавија официјални лица.
Вооружени лица претходно нападнаа полициски контролен пункт на автопатот западно од Тикрит и еден полицаец е убиен, а три лица се повредени. Полициската патрола успеала да ги избрка напаѓачите, но тие го активирале експлозивот во автомобилот со кој дошле и убиле уште четворица полицајци , ранувајќи уште две лица, соопшти полицијата.
Во селото Ал-Буслаиби, северно од Багдад, активирана е бомба кога поминувала воена патрола, при што загинаа тројца, а во северниот ирачки град Мосул загина еден војник кога вооружени лица нападнаа воен пункт.
Автомобил-бомба во Казнах, село во близина на Мосул, населено со малцинството Сабак усмрти седум лица, а повредени се 12, додека во одвоен напад кога два автомобила-бомби експлодираа во близина на шиитско светилиште загинаа петмина, а повредени се 26 луѓе во градот Туз Хурмату.
Три бомби експлодираа на патот во близина на Бакуба, северно од Багдад, убивајќи едно, а повредени беа четири лица.
Во експлозија на бомба која беше фрлена на полициска патрола во Мадаин повредени се тројца полицајци и двајца цивили. Во градот Рутба во провинцијата Анбар, во серија од 10 минофрлачки напад убиени се две лица, а повредени девет, изјавија официјални лица. Автомобил-бомба во близина на Дуџаил, северно од Багдад, усмрти еден ирачанец, а рани најмалку 10 ирански аџии.
Додека насилството во Ирак опадна, откако достигна врв во 2006. и 2007 година, напади и денес секојдневно се врши во таа земја.