Две недели по прекинувањето на преговорите со Комунистичката партија на Филипините и нејзиното воено крило „Нова народна армија“, филипинскиот претседател Родриго Дутерте ги прогласи комунистичките бунтовници за терористи.
Тој денес потпиша прокламација со која тие се прогласуваат за терористички организации и тоа е прв чекор во процесот на официјалната забрана на комунистичките партизани, кои војуваат со филипинската влада од крајот на 60-тите години на минатиот век.
Портпаролот на Дутерте, Хари Роке објаси дека прокламацијата на претседателот треба да биде потврдена со судско решенија, а од министерството за правда е побарано да поднесе соодветна тужба.
Тој појасни дека одлуката е во согласност со законот за безбедност на луѓето, бидејќи комунистите поттикнуваат и создаваат услови за масовен и екстремно голем страв и паника меѓу населението.
Двете организации се прогласени за терористички од страна на САД уште во 2002 година, но досега филипинските власти се обидуваа да преговараат со нив.