Државните службеници во Хонг Конг, без никакви пречки, денеска се вратија на работа, а училиштата во овој кинески специјален административен регион повтроно се отворени, откако бројот на демонстранти по улиците на градот е видливо намален, пренесе ДПА.
Протестното движење вчера се согласи да ги отстрани блокадите на владиниот комплекс, за да се избегне конфронтација со властите.
Главниот администратор на Хонг Конг, Леунг Чун-јинг во саботата на продемократските демонстранти им даде ултиматум до понеделник да ги остранат блокадите на главните патни артерии во кинескиот специјален административен регион. Во спротивен случај, властите ќе ги преземат „сите неопходни мерки за да го обноват јавниот ред“, предупреди Леунг во видео порака.
Истовремено со заканата тој на демонстрантите им вети и преговори доколку тие ги отстранат блокадите од пред владините објекти.