Поранешен претседател на Уставниот суд на Индонезија и функционер на партијата Голкар, 53-годишниот Акил Мохтар, поради коруптивен скандал е осуден на казна доживотен затвор.
До сега најстрогата казна за овој вид криминал, антикоруптивниот суд во Џакарта ја изрекол поради тоа што Акил примил поткуп од 4,7 милиони долара, за да ги легализира лажните изборни резултати при избор на гувернери на провинции и пратеници во централниот парламент на Индонезија.
Медиумите во Џакарта потсетуваат дека за време на 4 месечниот процес Акил во судот се однесувал арогантно, но кога доцна во ноќта во понеделникот ја чул пресудата од неговата ароганција немало трага.
Покрај поранешниот претседател на Уставниот суд, за корупција во Индонезија годинава се осудени и двајца министри и шест директори на владини агенции и државни компании.