Дванаесет италијански педијатри денеска се ставени во домашен притвор под обвиненија за земање поткуп од фармацевтската компанија во замена за поттикнување на млади мајки да не дојат, туку да купуваат адаптирано млеко, пренесе ДПА.
Единаесет од лекарите се од областа Тоскана.
Полицијата во домашен притвор стави петмина претставници и еден директор на фармацевска компанија, чие име не се наведува.
Педијатрите ги поттикнувале младите мајки да не дојат, за што од компанијата добивале скапи подароци, како смартфони и компјутери. Со овие пари педијатрите од туристичка агенција, соучесник на фармацевската компанија, си купиле ваучери за луксузни одмори.
– Се чудам како може педијатрите така да работат, газејќи ја својата професионална етика, раководните принципи на Министерство за здравство и препораките на целата научна заедница. Сето ова тие го правеле само за да добиваат луксузни подароци и бесплатни патувања, изјави италијанската министерка за здравство, Беатриче Лоренцин.