Американските сили стационирани во Јужна Кореја наводно се подготвени да одговорат на потенцијална кинеска инвазија на Тајван, објавува „Дејли меил“.
Британскиот весник потсетува дека американскиот министер за одбрана Пит Хегсет, говорејќи на безбедносната конференција во Сингапур минатиот месец, изјавил дека Пекинг се подготвува потенцијално да употреби воена сила за да го промени балансот на моќта во Индо-Пацификот, додавајќи дека Пентагон „се преориентира кон одвраќање на кинеската агресија“.
Ова би значело дека американските трупи стационирани во Јужна Кореја, како и во Јапонија и пацифичките острови Хаваи и Гуам, ќе играат голема улога во одвраќањето на Кина од каков било потенцијален напад врз Тајван.
Во Јужна Кореја моментално се распоредени 28.500 американски војници, а секое идно присуство на американски трупи е „оптимизирано“ не само за одбрана од Пјонгјанг, туку и за одвраќање на Кина.
Овој развој на настаните доаѓа откако Кина минатиот месец распореди десетици воени бродови и авиони кои ја опколија островската држава Тајван во заканувачки, големи воени игри.