Чешките политичари остро го осудија денешниот терористички напад врз францускиот сатиричен неделник„Шарли Ебдо”, во кој најмалку 12 лица загинаа, а десетина беа повредени, јави дописникот на МИА од Прага.
Според официјална Чешка овој чин е „варварски, ѕверски и налудничав и претставува напад врз слободата на говорот, на принципите на демократијата и евроатлантскиот идентитет”.
– Терористичкиот напад во Париз покажува дека треба да се продолжи со меѓународните напори и соработката на земјите во борбата против тероризмот, изјави чешкиот премиер Бохуслав Соботка изразувајќи длабоко сочувство за изгубените животи.
Пукањето во седиштето на неделникот, кој е познат по острите критики на политичарите и претставниците на религиите, вклучувајќи го исламот, категорично го осуди и чешкиот министер за надворешни работи Лубомир Заоралек.
– Целосно неприфатливо е однесувањето на напаѓачите кое претставува најгрубо непочитување на човечките животи и манифестација на непријателство кон слободниот говор, кон што се стреми и Чешка, изјави Заоралек.
И за заменик премиерот Павел Бјелобрадек, нападот на слободата на печатот е еден од варварските чинови на тероризам, оценувајќи дека сите земји во Европа треба заеднички да најдат решение за опасноста која им се заканува.
– Кога се обидувам овие нешта малку да ги минимизирам или на нив да гледам од поинаков агол, тоа што уште еднаш докажува, дека тероризмот во никој случај нема смисла за хумор, подвлече министерот за одбрана на Чешка, Мартин Стропницки.