На доделувањето на Нобеловата награда за мир, која годинава ја доби Европската унија, нема да присуствуваат шест земји, меѓу кои и Чешка, јави дописникот на МИА од Прага.
Иако официјалните органи на ЕУ не сакаат да шпекулираат која е причината за неучеството на чешкиот претседател Вацлав Клаус, сепак може да се претпостави дека зад тоа стои неговиот непроменет евроскептицизам.
Кога беше објавено дека ЕУ е добитник на престижната награда, Клаус искоментира дека помислил оти се работи за шега.
Чешкиот министер за надворешни работи Карел Шварценберг, кој е и еден од кандидатите за иден претседател на Чешка, потврди дека Клаус ја одбил поканата за учество на свеченоста по повод доделувањето со оглед на неговиот постојан конзистентен став кон ЕУ.
– Јас би го поздравил учеството на Чешка на таков исклучителен настан, бидејќи ние живееме во средината на Европа, додаде Шварценберг.
Според анкетите кои се појавија на интернет, во врска со бојкотот на чешкиот претседател на доделувањето на Нобеловата награда за мир, мнозинството Чеси гласале за тоа дека е исправно Чешка да не учествува на церемонијата бидејќи ЕУ не ја заслужува наградата.