Бројот на жртвите од минатомесечните шумски пожари на хавајскиот остров Мауи е ревидиран на 97, а бројот на исчезнати е 31, изјави гувернерот на Хаваите, Џош Грин.
Новите информации Грин ги објави во интервју за Си-Ен-Ен откако минатата недела изјави дека бројот на загинатите е 115, а 66 лица се водат како исчезнати. Појасни дека помал број жртви е утврден по дополнителни анализи на Министерството за одбрана, чии истражувачи, според него, се способни да вршат многу понапредни генетски анализи.
Во пожарот што на 8 август го зафати центарот на Лахаина на островот Мауи, уништени се повеќе од 2.000 згради.