Припадник на британските специјални единици САС е јунакот на заложничката криза во трговскиот центар во Најроби, откако спаси повеќе од 100 животи.
Според пишувањето на Дејли меил, војникот, кој не бил на должност, пиел кафе во Вестгејт мол, кога во саботата го нападнаа исламски терористи од Ал Шабаб, кои држеа неколку стотина заложници.
Со пиштол на појасот, снимен е како им помага на две жени и ги вади од комплексот. Потоа се враќал неколку пати во објектот и покрај интензивната престрелка.
„Тој е вистински херој. Пиеше кафе со пријателите кога почна нападот. Се враќаше 12 пати и спаси над 100 луѓе. Замислете постојано да се враќате, а знаете таму што се случува, изјави негов пријател од Најроби.
Извори велат дека станува збор за припадник на САС, но од безбедносни причини неговиот идентитет не смее да биде откриен.
Британскиот САС редовно тренира и оперира во Кенија и вклучен е во следењето на британски државјани поврзани со екстремистичките исламисти во Сомалија и Јемен.