Претставникот на Долниот дом на британскиот парламент и член на Конзервативната партија Тобијас Елвуд во интервју за Скај истакна дека Владимир Путин бил понижен поради руското повлекување и дека очекува рускиот претседател сега да најде начин да го ескалира конфликтот и дополнително да го зголеми влогот.
Елвуд, инаку претседател на парламентарната комисија за одбрана, моментално се наоѓа во јужниот пристанишен град на Украина, Одеса. Тој е убеден дека Украина е на пресврт во војната со Русија и стравува дека Русија ќе стане уште поекстремна.
„Путин сега е понижен. И постои огромна загриженост дека ќе оди уште поекстремно. Ќе најде поимагинативни начини да ги зголеми влоговите“, рече Елвуд.
Елвуд тврди дека Русите почнуваат да се прегрупираат од другата страна на реката Днепар, па затоа е важно светот да продолжи да ја поддржува Украина и да не потпишува никакви договори со Русија. Без оглед на неговата поддршка за Украина, Елвуд смета дека Путин требало да присуствува на самитот на Г-20 на Бали.
Тој верува дека Путин се откажал од тоа бидејќи индискиот премиер го понижил последниот пат кога се појавил на меѓународна конференција, инсистирајќи на одговорот на Путин на прашањето што прават Русите во Украина.
„Затоа наместо него го испрати Лавров. Но, на крајот, Лавров само ќе ги пренесе зборовите што ги кажува Путин и ќе каже дека тоа не е ничија работа. Тоа е наша работа бидејќи бродовите за жито не се движат како што треба, а безбедноста во Источна Европа е безбедност за сите“, додаде Елвуд.
Тој нагласува дека ова е вистинско време за протерување на Русите од Украина, со цел да се зачува постоењето на суверениот идентитет на Украина и да се создадат услови за идниот развој на украинската економија.
„Ако сега потпишеме каков било договор, сè што ќе направи Русија е да се прегрупира за повторно да нападне за една или две години“, заклучи тој.