Бразил ќе побара од Комисијата за човекови права во Обединетите нации информација за наводите дека американските разузнавачки служби ги прислушувале телефонските разговори и ги следеле интернет врските на бразилските граѓани, истакна претседателката на Бразил Дилма Русеф.
– Ставот на Бразил за тоа прашање е јасен и цврст, ние сме против секакво мешање во Бразил, како и во секоја друга држава. Тоа е кршење на суверенитетот и на човековите права, посочи Русеф.
Таа наведе и дека ја поддржува измената на бразилскиот закон со кој се регулира користењето интернет.
– Според нас, треба да се фокусираме на начинот на собирање податоци, што најчесто се собираат надвор од Бразил. Најмногу податоци собира „Гугл“, а ние сакаме податоците на Бразилците да се собираат во Бразил, истакна Русеф.