Брачен пар од Северна Каролина е обвинет дека извршил аматерски егзорцизам врз нивниот четиригодишен син, кој подоцна починал. Џозеф Пол Вилсон (41) и Џоди Ен Вилсон (38) од Маунт Ери беа уапсени на 13 јануари под сомнение дека нивните постапки довеле до смрт на нивниот син Скајлер Вилсон. Моментално се во притвор и не им е дозволено да платат кауција за ослободување.
Канцеларијата на шерифот на округот Сури потврди дека замениците на шерифот добиле повик на 6 јануари од Службите за заштита на деца за дете кое било примено во болница откако добило итна медицинска помош претходниот ден. Полицијата соопшти дека Скајлер починал на 9 јануари „од повреди поврзани со злоупотреба од неговите родители“.
Иако се уште не се откриваат причините за смртта, полицијата го истражува случајот како убиство. „Ова е трагичен настан што резултираше со прерана смрт на драгоцено дете“, се вели во соопштението на шерифот Стив Си Хиат. Вилсонови се посвоители на Скајлер, пренесува телевизискиот канал WFMY-TV од Гринсборо.
Тие се обвинети дека го врзале и изолирале Скајлер со цел да извршат егзорцизам. Само неколку часа пред Скајлер да биде однесен во болница, Џоди му испратила порака на својот сопруг велејќи дека нешто му се случило на детето. Таа испратила и фотографија од Скајлер како лежи со лицето надолу на подот, завиткан во ќебе кое е залепено на подот.
Осомничените ќе се појават на суд на 2 февруари, а се уште не се знае дали имаат обезбедено адвокат. Семејството Вилсон биле законски старатели на другите деца кои моментално се под грижа на Одделот за социјални услуги, соопшти канцеларијата на шерифот, пренесува NBC News.