Лидерот на Боко Харам објави денеска нов видео запис, на кој се гледаат стотина млади жени, претставени како нигериските ученички, киднапирани во средината на април во североисточниот дел на земјата.
Тој тврди дека ги преобратил ученичките во исламска вера и би ослободил неколку од нив, само ако ги размени за уапсени припадници на терористичката група.
Абубакар Шекау говори 17 минути на видео записот. Потоа камерата покажува стотина девојчиња покриени со наметки преку целото тело, за време на молитва на непознато место.
Вкупно 276 средношколки беа киднапирани на 14 април од нивното училиште во Шибок, во државата Борно, каде живее христијанска заедница. Педесет и три од нив успеаја да побегнат, а судбината на преостанатите 223 се уште е непозната.