Претседателот на Украина, Володимир Зеленски се уште не го потпишал новиот план за мобилизација, а украинската армија се жали дека нема доволно мажи. Речиси и да нема доброволци, воените комесари работат лошо, а наскоро ќе дојде зима, што ќе ја отежне ситуацијата на фронтот уште повеќе, пишува Блумберг.
Според агенцијата, украинскиот лидер повторно го одложил усвојувањето на нацрт-законот за намалување на старосната граница за мобилизација за време на воена состојба за мажи без воено искуство од 27 на 25 години, иако документот претходно бил одобрен од украинскиот Парламент.
Како што објаснува Блумберг, Зеленски се води од потребата да се заштити младите во земјата, поради што се обидува да го одложи усвојувањето на новиот план за мобилизација.
Сепак, расте притисокот во општеството да се одобри документот, бидејќи недостатокот на војници во вооружените сили на Украина ќе ја стави земјата во тешка положба.
Според проценките на украинската армија, новиот закон за мобилизација ќе овозможи распоредување на дополнителни 140.000 борци. Русија има тројно население, како и многу поголеми воени резерви, пишува Блумберг.
Инаку, според агенцијата, просечната возраст на војниците во украинската армија е над 40 години.
Температурата на воздухот опаѓа, но борбените операции продолжуваат, наведува авторот на текстот, посочувајќи дека „руската армија напредувала кон градот Авдеевка на исток, кој го држат украинските сили“.
Авторот истакнува дека во Украина речиси и да нема волонтери, бидејќи сите тие се веќе на првата линија.
Проблемот со недостигот на војници се надополнува со неуспехот на фронтот, претстојната зима, ракетните напади и слабата помош од сојузниците. Сето ова ја прави многу мрачна иднината на Украина, наведува авторот.
Според кабинетот на украинскиот претседател, таквата ситуација може да доведе до „интензивирање на тензиите“ и да придонесе за популарноста на идејата за „мир по секоја цена“ во општеството.