Преговорите за евентуален иден договор за слободна трговија меѓу Велика Британија и Европската Унија не можат да започнат се додека не се знаат прецизните рамки на разговорите во врска со заминувањето на Лондон од ЕУ, најави денеска портпаролот на германската Влада, Штефан Зајберт.
Според Зајберт, германската канцеларка Ангела Меркел јасно кажала дека Велика Британија и ЕУ ќе продолжат „блиску да соработуваат“, но дека во преговорите меѓу Лондон и Брисел мора прво да биде расчистено како идната соработка меѓу двата субјекти ќе влијае на нивните интереси.
На редовната прес-конференција Зајберт најави дека пред да преземе или да сугерира каков било чекор во однос на идната соработка со Велика Британија, Германија внимателно ќе ги разгледа предлозите за преговорите што доаѓаат од останатите 27 земји членки на ЕУ.
Во средата при активирањето на членот 50 од Лисабонскиот договор, со што официјално започна процедурата за истапување на Велика Британија од ЕУ, британската премиерка Тереза Меј побара паралелно со преговорите за Брегзит, да се разговори за идните трговски односи меѓу Лондон и Брисел.