„Повеќе црвен тепих отколку опомена“, вака дописникот на „Скај њуз“ од Москва, Ивор Бенет, го опишува самитот Трамп-Путин, кој ќе се одржи во Алјаска во петок.
Според него, во Москва „ги тријат рацете од задоволство“ гледајќи како се развива ситуацијата пред состанокот. Владимир Путин, вели Бенет, од минатиот петок, кога се соочуваше со рокот за воведување нови санкции од САД, стигна до точката што овој петок ќе седи на маса со американскиот претседател Доналд Трамп.
„Целиот притисок што се чинеше дека се зголемува врз Москва за да се стави крај на војната во Украина одеднаш се чини дека исчезна“, вели Бенет.
Трамп го опиша состанокот во петок како „запознавање“, но Бенет се прашува како Белата куќа сè уште не знае што сака Москва.
„Ако Трамп не знае кои се параметрите сега, многумина ќе се прашуваат што правела неговата администрација во последните шест месеци“, вели тој.
„Сите телефонски повици, сите состаноци, сите патувања низ светот – сè не значи ништо ако тој сè уште треба да ја открие руската позиција, бидејќи тоа значи дека не сме поблиску до мир отколку што бевме пред шест месеци“, вели дописникот.
Бенет забележува дека Европа и Украина ќе кажат дека „премногу добро ги познаваат“ позициите на Русија.
Руските медиуми ја опишуваат средбата како „голем момент“. Но, според Бенет, тие ја гледаат многу повеќе како можност за подобрување на билатералните односи меѓу Русија и САД отколку како одлучувачки момент за мир во Украина.
„Општиот консензус овде е дека Владимир Путин направи многу добар потег“, заклучува Бенет.