Најголемиот аеродром во Белгија утре ќе откаже половина од летовите, а ниту еден авион нема да полета од базата на Рајанер поради штрајк на синдикатите незадоволни од падот на куповната моќ.
Аеродромот „Завентем“ во Брисел, кој имаше два милиони патници во септември, најави дека очекува сериозни прекини и дека голем број летови се откажани или одложени. Вториот по големина аеродром Шарлроа јужно од Брисел ги откажа сите летови.
Јавниот превоз речиси ќе запре кога белгиските работници ќе маршираат низ Брисел барајќи повисоки плати и подобри работни услови.
Годишната инфлација во Белгија достигна 12,27 отсто во октомври, што е највисока од јуни 1975 година, пред се поради растот на цените на храната и енергијата.