Соединетите држави работат на план за потенцијално олеснување на санкциите кон Русија, бидејќи претседателот Доналд Трамп се обидува да ги обнови врските со Москва и да стави крај на војната во Украина, изјавија за Ројтерс американски функционер и друго лице запознаено со ова прашање.
Белата куќа побара од Стејт департментот и Министерството за финансии да состават листа на санкции кои би можеле да бидат ублажени за целите на разговорите меѓу американските претставници и руските претставници во наредните денови за подобрување на дипломатските и економските односи, велат изворите.
Канцелариите за санкции сега работат на предлог за укинување на санкциите за одредени субјекти и поединци, вклучително и некои руски олигарси, според извори.
Таканаречените документи за опции често се подготвуваат од официјални лица кои работат на санкции, но конкретното барање на Белата куќа за таков документ во последните денови ја нагласува подготвеноста на Трамп и неговите советници да ги олеснат руските санкции како дел од потенцијалниот договор со Москва, пишува Ројтерс.
Сè уште не е јасно што конкретно би можел да побара Вашингтон во замена за олеснување на санкциите, додава агенцијата.
Белата куќа, Стејт департментот, Министерството за финансии и руската амбасада во Вашингтон не одговорија веднаш на барањето на Ројтерс за коментар.
Трамп во јануари се закани дека ќе ги зголеми санкциите кон Русија доколку Путин не сака да преговара за крај на војната во Украина. Но, неодамна, претставници на администрацијата на Трамп отворено ја признаа можноста за олеснување на санкциите кон Москва.
Секретарот за финансии Скот Бесент за време на интервјуто на 20 февруари за телевизијата Блумберг рече дека Русија може да добие економско олеснување, во зависност од тоа како ќе им пристапи на преговорите во наредните недели.
Трамп на 26 февруари им рече на новинарите дека руските санкции може да бидат ублажени „во одреден момент“, потсетува Ројтерс.