Генералниот секретар на Обединетите нации Бан Ки-мун изјави дека Сирија се распаѓа и упати повик до меѓународната заедница да ја поддржи американско-руската иицијатива за преговори меѓу режимот и опозицијата.
Бан истакна дека конфликтот има длабоки политички корени и нема да биде решен со воени средства, се додека страните во него и некои нивни поддржувачи не ја отфрлат можноста дека военото решение е можно.
– Сирија се распаѓа пред наши очи. Хаосот создава поволна почва за радикализмот и се повеќе и се заканува на регионалната стабилност, рече Бан во порака до средбата во Техеран, посветена на Сирија.
– Ги повикувам сите земји да го искористат своето влијание за да придонесат за пресекување на доставките на оружје и да ги убедат странските групи да ги повлечат своите борци од Сирија, додаде генералниот секретар на ОН.
Тој пред новинарите во Њујорк изјави дека САД, Русија и ОН се уште не успеваат да решат серија проблеми, поврзани со идната меѓународна конференција за Сирија, меѓу кои е и закажувањето на датумот за неа. Иницијативата за таквата конференција беше поднесена на почетокот на мај од државниот секретар на САД Џон Кери и рускиот министер за надворешни работи Сергеј Лавров.
– Се водат активни консултации меѓу ОН, САД и Русија, но има многу елементи, кои треба да се дефинираат, рече Бан и додаде дека се уште не е определен взамено прифатлив датум за настанот.
Другите прашања за кои се уште нема согласност се и листата на учесници и кој треба да ја претставува сириската опозиција на конференцијата.