Генералниот секретар на Обединетите нации, Бан Ки-мун денеска во Виена на отворањето на Петиот глобален форум на Алијансата на цивилизациите на ОН (УНАОЦ) предупреди на опасност од верска војна во Сирија.
Тој истакна дека Сирија е интересен мозаик од племиња, јазици и религии и дека е загрижен поради верското и етничко насилство.
Бан изрази загриженост и поради војната во Мали и судирите на Блискиот Исток и ги повика Израелците и Палестинците да ги обноват преговорите, укажувајќи дека секој изгубен ден води се подалеку од посакуваното решение.
Претседателот на Генералното собрание на ОН Вук Јеремиќ, претходно повика за итен прекин на крвопролевањето во Сирија. Тој изјави дека поширокиот регион на Блискиот Исток во 21. век претставува главен предизвик за безбедноста и благосостојбата на целата планета, посебно нагласувајќи ги судирите во Сирија и положбата на палестинскиот народ.
– Начинот на кој се пристапува кон овие прашања, значајно ќе влијае врз правецот на дијалогот меѓу цивилизациите, нагласи Јеремиќ.