Генералниот секретар на ОН Бан Ки-мун најостро го осуди убиството на седум припадници на мировните сили во регионот на Дарфур на западот на Судан и ги повика суданските власти итно да ги казнат извршителите, соопшти неговиот портпарол Мартин Несирски.
Седум мировници од Танзанија, меѓу кои и две жени, беа убиени од заседа од екстремисти, додека биле во патрола кај градот Манаваши.
– Генералниот секретар е шокиран поради смртоносниот напад врз мировниците во Дарфур, рече Несирски и додаде дека Бан упатил „искрено сочувство“ на семејствата на настраданите и на Владата на Танзанија.
Бан исто така побара од суданските власти да ги пронајдат и казнат извршителите на убиството.
Мисијата УНАМИД во Дарфур има околу 19.500 припадници.