Американскиот претседател Џозеф Бајден изјави дека израелскиот премиер Бенјамин Нетанјаху треба да најде начин да ги земе предвид легитимните барања на Палестинците за долгорочна стабилност на Израел.
„Идејата дека Израел може да опстане долго време без да го реши палестинското прашање…Тоа нема да се случи“, рече Бајден во интервју за MSNBC, додавајќи дека често го потсетувал Нетанјаху дека мора да најде начин да одговори на потребите на Палестинците.
И покрај повремените критики на Нетанјаху, Бајден ја задржа цврстата поддршка за сојузникот на Вашингтон. САД во четвртокот објавија дека очекуваат примена на договорот за прекин на огнот меѓу Израел и Хамас во недела.
Соединетите држави со децении го поддржуваат решението за две држави, кое би основало палестинска држава на Западниот Брег и Газа заедно со Израел, пренесува Танјуг.
Сепак, Нетанјаху тврди дека Израел мора да одржува безбедносна контрола над целата територија западно од реката Јордан, што го прави невозможно создавањето на суверена палестинска држава.
Меѓународниот суд на правдата смета дека израелската окупација на палестинските територии и изградбата на населби на тие територии се нелегални.