Американскиот претседател Џо Бајден изјави денеска – десет години по масакрот во училиштето во Сенди Хук, дека Америка има „морална обврска“ подобро да ја регулира сопственоста на огненото оружје.
„Решен сум да ги забранам пушките и муницијата со голем капацитет“, рече Бајден. Републиканската партија засега е против.
„Мораме да ги елиминираме оние оружја чија единствена цел е да убијат голем број луѓе“, додаде тој.
„Можеме да го направиме тоа, не само за доброто на изгубените невини животи, туку и за доброто на преживеаните кои ја задржуваат надежта“.
„Треба да се чувствуваме виновни што ни требаше предолго да го решиме овој проблем. Имаме морална обврска да гласаме и да ги спроведеме законите што можат да спречат овие работи да се повторат“, рече Бајден.
Бајден потсети дека благодарение на него е донесен закон кој има за цел да ги спречи потенцијално опасните луѓе да набавуваат оружје и дека потпишал декрети со кои се регулира оружјето што може да се произведува дома со 3Д принтери.
Во основното училиште Сенди Хук во Њутаун на 14 декември 2012 година, вооружен напаѓач уби 26 луѓе, вклучувајќи 20 деца на возраст од шест и седум години. Драмата ја потресе Америка и доведе до солзи на тогашниот претседател Барак Обама, но тоа не резултираше со вистински обврзувачки мерки.
Бајден сака да ги забрани автоматските пушки, кои ги користел напаѓачот на Сенди Хук. Но, републиканците и моќното лоби за оружје НРА се противат на враќање на забраната, која беше на сила од 1994 до 2004 година.