Авион на Austrian Airlines (AUA) од Мајорка слета во Виена откако претрпе сериозни оштетувања кога за време на летот влетал во бура. Од авиокомпанијата истакнаа дека летот OS434 влетал во невреме со град на пат од Палма де Мајорка, Шпанија, до Виена, Австрија. Авионот на аеродромот во Виена стасал со целосно оштетен нос , а напукна и ветробранското стакло во пилотската кабина. Компанијата соопшти дека фронтот од градоносните облаци не бил видлив на радарот во процесот на спуштање.
– Мислам дека бевме околу 20 минути пред слетување кога влеговме во облак и почнаа турбуленции – истакна патничката Емели Оукли.
Како што пренесува RTL, инцидентот се случил над Хартберг во Австрија, кој е на околу 150 километри од Виена, на надморска височина од околу 6.000 метри. И покрај оштетувањата, Ербас А320 успеа безбедно да слета.
Станува збор за авион Ербас А320, стар 23 години.
Противпожарната бригада на аеродромот и спасувачките служби веднаш излегле на терен, но не морале да интервенираат бидејќи за среќа, нема повредени.