Либанскиот претседател Џозеф Аун изјави дека единственото решение за ситуацијата со која се соочува Либан е прекин на огнот со Израел што би довело до директни разговори меѓу двете земји, соопшти неговиот кабинет.
Аун рече дека предлогот на Либан за прекин на огнот и разговорите почнува да добива позитивни реакции во меѓународните кругови, објави „Тајмс оф Израел“.
Тој додаде дека Либан продолжува да води меѓународни разговори за ова прашање.
Израелскиот премиер Бенјамин Нетанјаху вчера изјави дека им наложил на дипломатите што е можно поскоро да започнат директни разговори со Бејрут.
Израелски функционер изјави за „Тајмс оф Израел“ дека разговорите со Либан ќе се одржат без почетен прекин на огнот.
Американскиот претседател Доналд Трамп во телефонски разговор го замоли Нетанјаху да го намали интензитетот на нападите на Израел врз Либан за да се обезбеди успех на преговорите со Иран, изјави денес висок функционер на американската администрација за „Ен-Би-Си њуз“.