Федералниот апелационен суд во Вашингтон во средата му дозволи на американскиот претседател Доналд Трамп да го задржи пакетот царини што ги воведе во февруари и април, во исчекување на жалба на неодамнешната пресуда на понискиот суд со која се оспоруваат тие мерки.
Царините од февруари кои се воведени за Кина, Канада и Мексико, како и голем број царини воведени на практично секоја земја и територија во светот на 2 април, остануваат на сила, објави Ројтерс.
Апелацискиот суд заклучи дека спорот е од „исклучителна важност“ и затоа одлучи целиот панел од 11 судии да го разгледа случајот на 31 јули, наместо прво да го испрати случајот до панел од тројца судии.
Одлуката ја суспендираше пресудата на Трговскиот суд на САД од 28 мај, која утврди дека Трамп ги пречекорил своите претседателски овластувања со наметнување на царините според Законот за меѓународни економски вонредни овластувања (IEEPA).
Судот пресуди дека Конгресот, а не претседателот, има овластување да наметнува даноци и давачки, а администрацијата на Трамп поднесе жалба на одлуката следниот ден.
Против царините на Трамп се поднесени најмалку две тужби, во кои се тврди дека долгогодишниот трговски дефицит на Соединетите Американски Држави не претставува „вонредна и необична закана“ според IEEPA и дека Трамп нема законско овластување сам да води трговска политика.