Речиси половина од Чесите во најновата анкета на агенцијата СТЕМ/МАРК, на скалилото од 1 (најдобро) до 5 (најлошо) ја оценуваат Владата на Чешка со оценката три, јави дописникот на МИА од Прага.
Дека работата на владиниот Кабинет заслужува најдобра оценка, единица, сметаат 1,5 проценти од анкетираните, додека за 13,5 проценти Чеси, Владата не би добила преодна оценка, туку петка.
Најчесто, 46,7 проценти од испитаниците, сметаат дека работата на Владата, по претходниот наведен систем на оценување заслужува тројка.
Според последното истражување, мнозинството Чеси (67 проценти) сметаат дека чешката владина коалиција ќе остане на власт и оваа година. Спротивното го мислат околу една четвртина од испитаниците (27 посто).
Во анкетата, исто така се гласаше и за личност на годината и највеќе гласови, 15 проценти, доби министерот за финансии Андреј Бабиш, за претседателот на државата Милош Земан гласале седум отсто, а за премиерот Бохуслав Соботка два проценти од анкетираните.