Специјалниот пратеник на ОН и Арапската лига за Сирија Кофи Анан денеска пристигна во Техеран, каде со иранските лидери ќе разговара за решавање на сириската криза, изјави Ахмед Фаузи, портпаролот на Анан.
Анан пристигна во иранскиот главен град директно од Дамаск, каде се сретна со претседателот Башар ал Асад.
Во Техеран тој ќе разговара со иранскиот министер за надворешни работи Али акбар Салехи, како и со секретарот на иранскиот Висок совет за национална безбедност Саид Џалили.
Анан многу пати повикал за приклучување на Иран кон напорите за прекин на насилството во Сирија. Иран се смета за сојузник на Дамаск, но независно од неговото влијание во регионот негови претставници не беа поканети на меѓународната средба за Сирија во Женева, и покрај изјавите на Анан дека Техеран „треба да биде дел од решението на сирискиот проблем“.