Поранешна аналитичарка на ФБИ е осудена на речиси четири години затвор поради прекршување на Законот за шпионажа со чување доверливи документи во нејзиниот приватен дом. Со слично обвинение се соочува и поранешниот американски претседател Доналд Трамп, кој чуваше доверливи владини документи во својата резиденција во Мар-а-Лаго.
Поранешната аналитичарка Кендра Кингсбери работеше за одделот на ФБИ во Канзас Сити од 2004 до 2017 година, што и даде строго тајно безбедносно одобрение и пристап до „националната одбрана и доверливи информации“, соопшти Министерството за правда на САД.
За време на нејзината обука, Кингсбери беше предупредена дека доверливите информации може да се чуваат само во „одобрен објект и контејнер“, напиша Одделот. Сепак, поранешната аналитичарка призна дека постојано носела доверливи документи, вклучително и информации поврзани со националната одбрана, во нејзиниот дом, кој во тоа време бил во Северен Канзас Сити, Мисури, пренесува Insider.
Според соопштението на властите, Кингсбери незаконски одзел 386 доверливи документи. Некои од документите се класифицирани „на ТАЈНО ниво“, соопшти Министерството за правда.
“Овие документи опишуваат разузнавачки извори и методи поврзани со напорите на американската влада да собере разузнавачки информации за терористичките групи. Документите вклучуваа информации за членови на Ал Каеда на африканскиот континент, вклучително и осомничен соработник на Осама бин Ладен. Покрај тоа, имаше документи поврзани со активностите на новите терористи и нивните напори да се етаблираат во поддршка на Ал Каеда во Африка“, се вели во соопштението.