Американскиот носач на авиони „УСС Џералд Р. Форд“ е во сериозна состојба откако избувна пожар во неговата главна перална кој гореше повеќе од 30 часа, објави „Њујорк тајмс“.
Пожарот остави повеќе од 600 членови на екипажот без кревети во нивните спални соби. Двајца морнари побараа медицинска помош поради полесни повреди, додека десетици страдаа од вдишување чад.
Носачот, на кој има околу 4.500 морнари и пилоти, моментално е во својот 10-ти месец од распоредувањето, една од најдолгите мисии од Виетнамската војна. Се очекува распоредувањето да трае до мај.
Носачот на авиони „УСС Џералд Р. Форд“ учествува во операции на Блискиот Исток, вклучително и заеднички воени вежби на САД и Израел против Иран, откако претходно беше распореден во Карибите.
Според официјалните информации, пожарот избувнал во отворот за вентилација на сушарата во пералната и брзо се проширил, но не влијаел на погонските системи на бродот. Екипажот успеал да го локализира и изгасне пожарот, а носачот останал целосно оперативен.
Сепак, инцидентот повторно го отвори прашањето за товарот на бродот и екипажот. Покрај пожарот, беа регистрирани и проблеми со одржувањето, вклучувајќи дефекти во дури 650 тоалети, како и одложување на редовните поправки.
Во меѓувреме, Пентагон планира да го замени носачот на авиони „УСС Џорџ Х. В. Буш“ со „Форд“ во операциите на Блискиот Исток, додека морнарите и воените експерти предупредуваат дека долгорочните распоредувања сериозно ги исцрпуваат и опремата и персоналот.