Судот во Москва го осуди 72-годишниот американски државјанин Стивен Хабард на шест години затвор бидејќи, според нив, се борел како платеник за Украина.
Хабард, кој по потекло е од Мичиген, е обвинет дека се борел против Русија за плата и минатиот месец се изјасни за виновен по обвиненијата дека бил платеник. Руските обвинители тврдеа дека Хабард бил дел од украинската војска во клучниот град Изум, за што добивал околу 1.000 долари месечно.
Во април 2022 година, тој беше заробен од руските сили.
„Да, се согласувам со обвиненијата“, изјави Хабард пред градскиот суд во Москва за време на сослушувањето во септември. Неговото судење и изрекувањето на пресудата се одржаа зад затворени врати во московскиот суд.