Делови од Централната железничка станица во Стокхолм вечерва беа опколени поради аларм за бомба, по што на местото пристигнаа полициски експерти за експлозиви.
Алармот се вклучил во 17 часот и 45 минути, а на главната станица во главниот град на Шведска бил пронајден „сомнителен опасен предмет“, поради што полицијата опколила делови од зградата.
Како што пренесува Експресен, приведени се неколку лица, но полицијата не сакала да открие повеќе детали за бројот на уапсените лица и нивната возраст.
Целата северна сала беше затворена, а полицијата ја опколи областа и ги предупреди луѓето да се повлечат.
На местото на настанот била повикана Националната единица за експлозиви, која го задржала сомнителниот предмет, кој дополнително ќе се истражува.
Полицијата не соопшти дали навистина се работи за бомба, а станицата била деблокирана во 19.15 часот.