Фотографиите на кои полицаец од непосредна близина ја прска со солзавец жената во црвен фустан стана симбол на протестите во Турција против исламистичката власт на Ердоган.
Оваа жена, како и многу други сонароднички, се грижи за правата на жените и е борец против носењето женски вел во традиционалната и секуларна Турција.
Жената е облечена во летен црвен фустан, со ѓердан околу вратот и бела торба наметната на едното рамо.
Британскиот таблоид „Дејли мејл“ пишува дека оваа слика многупати е споделена на социјалните мрежи, а веќе се наоѓа на сите постери и налепници, бидејќи „жената во црвено“ стана симбол на демонстранти на антивладините протести во Турција.
– Оваа фотографија ја прикажува суштината на овие протести.
– Насилното однесување на полицијата врз мирните демонстранти, луѓе кои сакаат да се заштитат самите себе и тоа што го сметаат за вредно – вели Езра, студентка на математика од Бешикташ.
На ѕидовите на зградите во најголемиот турски град се залепени постери на непознат уметник, на кои „жената во црвено“ изгледа многу поголема од полицајците.
– Колку повеќе прскате солзавец, толку сме поголеми“ – пишува на постерот.
Петар Клинчарски