Пратеникот на ВМРО-ДПМНЕ, Влатко Ѓорчев, од собраниска говорница побара да се повлече, како што рече, срамниот закон, со кој се предвидува да им се зголеми платата на вицепремиерите Радмила Шекеринска, Кочо Анѓушев, Хазби Лика и на Бујар Османи. Тој ги повика пратениците да се откажат од неадекватното зголемување на платите.
„Веднаш повлечете ги овие точки од дневен ред за зголемување на платата на функционерите и вториот закон со кој се предвидува да се стави заменик-директор на Агенција за поттикнување и развој на земјоделството. Срамно е ова што го правите. Малку ви се плати од 70.000 денари, па сега барате уште 8.000 денари. Срамно е и со заменик-директорите што ќе се плаќаат од грбот на народот“, рече Ѓорчев.
Точките остануваат на дневен ред бидејќи пратениците не го изгласаа предлогот на Ѓорчев.
Габриела Димковиќ-Мишевска