Соединетите Американски Држави и Украина планираат да потпишат договор за минерални суровини, по расправијата во Овалната соба минатиот петок, кога украинскиот претседател Володимир Зеленски беше исфрлен од Белата куќа, објави Ројтерс, цитирајќи четири извори запознаени со ситуацијата.
Американскиот претседател Доналд Трамп им рекол на своите советници дека сака да го објави договорот во своето обраќање пред Конгресот, кој ќе го достави вечерва, соопштија три извори, нагласувајќи дека договорот се уште не е потпишан и дека ситуацијата може да се промени.
Белата куќа не одговори веднаш на барањето за коментар. Украинската претседателска администрација во Киев и Украинската амбасада во Вашингтон не одговорија веднаш на барањата за коментар.
Договорот беше прекинат во петокот по спорниот состанок на Овалната соба меѓу Трамп и украинскиот претседател Володимир Зеленски, што резултираше со брзо заминување на украинскиот лидер од Белата куќа. Зеленски отпатува во Вашингтон за да го потпише договорот.
За време на таа средба, Трамп и потпретседателот Џеј-Ди Венс го критикуваа Зеленски, велејќи му дека треба да им се заблагодари на САД за поддршката наместо да бара дополнителна помош пред американските медиуми.
„Се коцкаш со Трета светска војна“, му рече Трамп.
Американските власти разговараа со претставници на Киев во последните денови за потпишување на договорот за минерали и покрај спорот и ги повикаа советниците на Зеленски да го убедат украинскиот претседател јавно да му се извини на Трамп, рече еден од изворите запознаени со ситуацијата.
Зеленски на X објави дека Украина е подготвена да го потпише договорот и рече дека му е жал за она што се случи во Белата куќа.
„Нашиот состанок во Вашингтон, во Белата куќа во петокот, не помина според планираното“, напиша тој во својата објава.
– Украина е подготвена да дојде на преговарачка маса што е можно поскоро за да се доближи траен мир, изјави Зеленски.
Не се знае дали има промени во договорот.
Договорот што требаше да биде потпишан минатата недела не вклучуваше експлицитни безбедносни гаранции за Украина, но им овозможи на САД пристап до приходите од природните ресурси на Украина. Исто така, предвидуваше украинската влада да придонесе 50% од идната монетизација на сите државни природни ресурси во фондот за реконструкција управуван од САД и Украина.
Трамп вчера сигнализираше дека неговата администрација останува отворена за потпишување на договорот, велејќи им на новинарите дека Украина „треба да биде поблагодарна“.