Работните групи на ВМРО-ДПМНЕ и Коалицијата „Вреди“ продолжуваат со преговорите за коалицирање во новата Влада, а ВМРО-ДПМНЕ влегува во преговорите со 61 пратеник, односно обезбедено мнозинство во Собранието.
Лидерот на ВМРО-ДПМНЕ и иден мандатар, Христијан Мицкоски истакна дека покрај 58 пратеници на коалицијата „Твоја Македонија, имаат консолидирано точно 61 пратеник и информира дека разговорите со „Вреди“ се водат во вистинска насока, но не кажа кои се пратениците со кои ВМРО-ДПМНЕ стигна до парламентарно мнозинство.
– Можам да кажам дека како „Твоја Македонија“ предводена од ВМРО-ДПМНЕ во Парламентот покрај 58 пратеници кои ги има автентично, очекуваме одлука на Управниот суд да видиме што ќе се случува со изборната единица 5 и 6, можам со задоволство да кажам дека имаме консолидирано точно 61 пратеник, но тоа нема да не повлече од разговорите со идните потенцијални коалициски партнери како што е коалицијата „Вреди“, изјави Мицкоски.
Неофицијално, се работи за пратеници на НСДП и ЛДП кои беа дел од предизборната коалиција „За Европска иднина“ предводена од СДСМ. Овие две партии освоија четири пратенички места.
Со 13 пратеници на Коалицијата ВЛЕН, ВМРО-ДПМНЕ би имал 74 пратеници, а доколку се приклучи и ЗНАМ на Максим Димитриевски со своитее шест пратеници, ќе има и двотретинско мнозинство кое идниот мандатар Христијан Мицкоски го побара за да донесе неколку клучни измени за функционирањето на извршната власт како што е намалување на бројот на министерства.
Работните групи на ВМРО-ДПМНЕ и Коалицијата „Вреди“ на првата средба за разговори за коалицирање во новата влада се договориле да се запазат договорените принципи на делување, силно динамизирање на ЕУ интеграции, бескрупулозна борба против корупцијата и криминалот и економски реформи за повисок животен стандард.
Според првичните официјални резултати за парламентарите избори што ги објави ДИК, Коалицијата Твоја Македонија предводена од ВМРО-ДПМНЕ освоено најмногу пратенички мандати, 58, по што следуваат Коалицијата Европски фронт предводена од ДУИ со 19 пратенички мандати, Коалицијата за европска иднина предводена од СДСМ, 18, Коалицијата ВЛЕН, 13, а Движење ЗНАМ за наша Македонија и Левица по шест пратенички мандати.