Францускиот претседател Емануел Макрон кој денеска во Париз имаше средба со ирскиот премиер Лео Варадкар, не ја криеше вознемиреноста за Брегзит, јави дописникот на МИА.
– Нашиот приоритет мора да биде правилното функционирање на Европска Унија и единствениот пазар. ЕУ не може да биде трајно заложник на решавање на политичката криза во Обединетото Кралство, истакна Макрон.
Тој додаде дека неуспехот да се претстави „веродостоен алтернативен план до 10 април“, Лондон „де факто ќе одлучи да излезе без договор“.
Макрон истакна и дека Франција и Европа „никогаш нема да ги напуштат што и да се случи, Ирска и Ирците“.
Од своја страна, Варадкар потсети дека „сè уште има време за британската премиерка да поднесе предлози“.
– Мислам дека мора да останеме отворени за секој предлог што таа ќе го даде, посочи Варадкар.