Меѓународната набљудувачка група „Амнести интернешенел“ соопштува дека добила кредибилни докази за малтретирање на приведените по неуспешниот државен удар. Организацијата посочува дека има докази за приведени лица, кои биле тепани и изложувани на други видови тортура, вклучувајќи силување.
„Неопходно е турските власти да престанат со овие одвратни практики и да им овозможат на меѓународни набљудувачи да ги посетат уапсените на местата каде што се чуваат“, се вели во соопштението на Џон Далхаузен, директор на одделот на „Амнести интернешенел“ за Европа и Централна Азија.
Организацијата наведува дека постојат алармантни сведоштва за тортура и малтретирање на уапсените, особено во спортската сала на полициска станица во Анкара. Според информациите најмногу на удар се воените лица кои имаат високи чинови во армијата кои биле силувани, а војниците биле изгладнувани и тепани.
Според овие извештаи, полицијата ги држи притворените во стресни ситуации, не им обезбедува храна, вода и медицински третман. Вербално се малтретирании подложени на тепање и тортура вклучувајќи и силувања – стои во извештајот на Амнести интернешенел.
Турскиот претседател Реџеп Таип Ердоган вчера потпиша декрет според кој се продолжуваат апсењата на некои осомничени до 30 дена, без да има покренато обвинение против нив. Според „Амнести интернешенел“, со оваа одлука се зголемува ризикот за изложување на приведените на различни мачења.