Чувството на слобода кога се возите по убав сончев ден, непопречениот поглед на околината и, најпосле, привлекувањето внимание од минувачите додека се возите во кабриолет, одсекогаш биле најсилните адути за моделите со отворен покриви.
Според најновото истражување кое ги опфати Европа и Северна Америка, сепак, продажбата на кабриолети е опадната за половина во однос на 2007 година.
Студијата што ја спроведе „Autofacts“ покажува дека бројот на продадени автомобили со отворен покрив на овие пазари е намален од 827.000 во 2007 година, на 444.000 кабриолети, колку што се продадени во 2013 година.
Се смета дека една од причините за ваквото придвижување на пазарот е растот на продажбата на СУВ и кросовер возилата. Сепак, аналитичарите оценуваат дека главната причина за послабата продажба на кабриолети во Европа и Северна Америка, е пошироката достапност на моделите со големи, подвижни панорамски покривни прозорци, кои се застапени во сите автомобилски сегменти.
На овој начин, купувачите можат со помала цена во однос на кабриолетите, да добијат возило со слична намена, во кое, кога ќе посакаат, ќе можат да имаат чувство на возење со отворен покрив.
Некои производители веќе ги препознаа ваквите пазарни движења, па почнаа да укинуваат одделни модели на кабриолети.
„Фолксваген“, на пример, не го планира наследникот на моделот „Еос“, а извршниот директор на оваа групација, Мартин Винтеркорн, изави дека за целата „ФВ“ група се доволни само два кабриолета.