Српскиот кошаркар и кандидат за најкорисен играч (МВП) на НБА лигата, Никола Јокиќ, по третпат во оваа сезона е прогласен за најдобар играч на неделата во Западната конференција.
Со ова, Србинот се израмни со легендата на Денвер Нагетс, Кармело Ентони, којшто е единствен играч во историјата на клубот што имал три такви признанија во една сезона. Јокиќ исто така има вкупно девет награди за играч на неделата, а Ентони го држи клупскиот рекорд со десет.
Јокиќ во 13-тата недела од скратената НБА сезона одигра четири натпревари, во кои просечно бележеше 26,8 поени, 12,3 скокови и 8,5 асистенции, водејќи го својот тим до скор од 3:1 во изминатата седмица.
26-годишниот Јокиќ оваа сезона за првпат во неговата НБА кариера е сериозен кандидат за наградата МВП на регуларниот дел од сезоната, а негови најголеми ривали за престижното признание се Леброн Џејмс и Џоел Ембид.