Американскиот претседател Доналд Трамп изјави дека лично побарал од претседателот на ФИФА, Џани Инфантино, повторно да го разгледа црвениот картон и суспензијата од еден натпревар на американскиот напаѓач Фоларин Балогун, што предизвика големи контроверзии на Светското првенство.
ФИФА во неделата објави дека Балогун ќе може да настапи на вечерашниот осминафинален натпревар против Белгија. Одлуката предизвика политичка бура и отвори прашања за интегритетот на натпреварувањето.
„Сè што направив беше да побарам повторно да се разгледа случајот. Не реков: ‘Морате да го направите тоа’“, изјави Трамп од Овалната соба.
Тој додаде дека, според неговото мислење, немало прекршок. Инцидентот го опиша како ситуација во која „двајца играчи трчале со полна брзина и случајно се судриле“.
Изјавите на Трамп се неговото прво подетално објаснување за разговорот со Инфантино во врска со црвениот картон на Балогун.
„Не му кажав што треба да направи, не можам да му кажувам што да прави“, рече Трамп, додавајќи дека независниот одбор ја донел „правилната одлука“.
Балогун доби црвен картон на натпреварот против Босна и Херцеговина, што автоматски значеше суспензија од еден натпревар. Потоа ФИФА го суспендираше извршувањето на казната, па американскиот напаѓач ќе може да игра против Белгија.
Одлуката предизвика остри реакции, особено во Белгија. Белгискиот фудбалски сојуз изрази изненадување и разгледува понатамошни чекори поради одлуката на ФИФА, додека се појавија и критики дека политичкиот притисок го загрозува кредибилитетот на турнирот.
Трамп продолжи да зборува за контроверзната одлука на ФИФА да ја суспендира казната за Балогун.
„Мислам дека одлуката на судијата беше ужасна, а никој не зборува за тоа“, им рече тој на новинарите во Овалната соба.
„Сите зборуваат за црвениот картон како тоа да е нормално, а никој не зборува за одлуката на судијата да му покаже црвен картон.“
„Немав поим што, по ѓаволите, е црвен картон. Кога дознав, реков: ‘Ајде, сигурно се шегувате’“, изјави Трамп.
Тој ги обвини судиите дека можат да одлучат „вашиот најдобар играч да не игра следната недела или на следниот натпревар“.
„Реков: ‘Леле, тоа е огромна моќ“, додаде тој.
„Тоа е ужасно, а потоа ја погледнав неговата историја и не беше баш сјајна“, рече Трамп.
Трамп во Овалната соба го доведе во прашање и интегритетот на судијата кој му го покажа црвениот картон на Балогун.
Тој изјави дека судијата бил „малку сомнителен“ и ги повика новинарите „да ја проверат неговата историја“.
Американскиот претседател тврди дека не барал ФИФА да донесе конкретна одлука, туку само повторно да го разгледа случајот. Сепак, одлуката на ФИФА отвори широка дебата за можниот политички влијание врз фудбалското натпреварување.
Балогун е еден од клучните играчи на американската репрезентација на ова Светско првенство.