Шпанскиот репрезентативец и плејмејкер на Реал Мадрид Серхио Родригез е прогласен за МВП (најкорисен играч) на сезоната 2013/2014 во Евролигата. Наградата му беше врачена на денешната церемонија во Милано, каде од утре до недела ќе се одржи завршницата на годинашново издание од Евролигата.
Родригез е најефикасен во својот тим со 13,5 поени по натпревар, а целата сезона ја одигра во голем стил и постигнуваше важни поени во последната четвртина.
Досега оваа награда ја имаат добиено: 2005 година – Ентони Паркер (Макаби); 2006 – Ентони Паркер (Макаби); 2007 – Теодорас Папалукас (ЦСКА Москва); 2008 – Рамунас Шишкаускас (ЦСКА Москва); 2009 – Хуан Карлос Наваро (Барселона); 2010 – Милош Теодосиќ (Олимпијакос); 2011 – Димитрис Дијамантидис (Панатинаикос); 2012 – Андреј Кириленко (ЦСКА Москва) и 2013 – Василис Спанулис (Олимпијакос).