Извршниот директор на Евролигата, Ќус Буено, откри нови детали околу иднината на европската кошарка и можните големи промени во елитното натпреварување.
Според него, интересот за влез во Евролигата е поголем од кога било досега. Тој изјавил дека постојат дури 17 понуди за нови франшизи, додека околу 40 клубови сакаат да се приклучат на Еврокупот.
Буено посочи дека во иднина Евролигата би можела да се прошири на 22 или дури 24 екипи, што би претставувало една од најголемите промени во историјата на натпреварувањето. Планот е новиот формат да стартува од сезоната 2027/2028.
Првиот човек на Евролигата зборува и за односите со ФИБА, нагласувајќи дека постои желба за подобра соработка и конечно решение за проблемот со репрезентативните квалификациски прозорци.
Тој додаде дека европската кошарка мора да остане заснована на клубови и навивачка традиција, а не само на бизнис модели, истакнувајќи дека спортските клубови претставуваат заедници со долга историја и вредности.