Директорот на „Ролс-Ројс“ потврди дека нивниот тим дизајнери работи на ексклузивен СУВ модел. Британскиот магазин „АуроЕкспрес“ предвидува како може да изгледа првиот теренец на „Ролс-Ројс“.
Се чини дека „Емили“, симболот на предниот дел на автомобилите на „Ролс“, во следните неколку години ќе нафрли некој килограм.
„Ролс-Ројс“ еден од производителите на автомобили кои најверно се држеше до својата традиција се подготвува за влез на пазарот на СУВ возила. Причина за отфрлање на традицијата, како што најчесто се случува, е желбата за заработка.
Според директорот на компанијата „Ролс-Ројс“, Торстен Милер, постои многу важна група млади купувачи кои се во своите 20-ти или 30-ти години, а кои се „супер богати“ и кои сакаат „Ролс“, но не лимузина. Овие млади богаташи, според него, се „спортисти, музичари, но и Кинези“.
– СУВ сегментот е многу интересен. Постои голема побарувачка за такви возила и јас сум отворен за тоа, изјави директорот на компанијата „Ролс-Ројс“.
Дизајнерите на магазинот „АутоЕкспрес“ се потрудија да ни претстават како овој СУВ би можел да изгледа користејќи го актуелниот дизајнерски јазик применет врз моделите „Гоуст“ и „Рајт“.
Мислиме дека е јасно зошто „Ролс-Ројс“ сака да произведе СУВ и на кого му е наменет.