Во редовите на Работнички и Шкендија владее оптимизам пред финалето на фудбалскиот Куп на Македонија.
Работнички, кој е бранител на титулата, ќе се обиде да го освои третиот последователен трофеј во ова натпреварување.
– Многу сум горд на фудбалерите за ова седмо финале на Работнички и ќе се обидеме да освоиме титула. Ја респектирам екипата на Шкендија, покажаа дека имаат квалитет и нијанси ќе го одлучат победникот, изјави тренерот на Работнчки Томислав Франц.
Капитенот на Работнички Милан Илиевски, верува дека тимот од Дебар Маало може да стигне до „три во низа“.
– Ниедна екипа досега не успеала да освои три титули во Купот по ред и можам да кажам дека ќе го дадеме максимумот, за да ја испишеме историја на клубот, истакна Илиевски.
Тимот од Тетово се уште се нема радувано на ваков трофеј, а најблиску беше во 2013 година, кога во финалето загуби од Тетекс на пенали, додека во сезоната 2005/2006 беше поразена од Македонија ЃП со 3-2.
– Сите играчи се здрави, ќе дадеме се од себе, со надеж дека ќе го освоиме трофејот од Купот на Македонија. Екипите се со ист квалитет и се надевам на добар фудбалски натпревар. Според резултатите сме фаворити, но дуелот со Работнички нема да е нималку лесен, истакна тренерот на Шкендија Бруно Акраповиќ.
Финалето од Купот на Македонија меѓу Работнички и Шкендија ќе се игра во понеделник на националната арена „Филип Втори“ во Скопје со почеток од 20 часот.