Блискиот пријател и поранешен шеф на Михаел Шумахер, Флавио Бријаторе, ја сподели емотивната вест за состојбата на легендата на Формула 1.
Шумахер претрпе тешка повреда на мозокот по несреќата на скијањето во декември 2013 година, а неговата сопруга Корина ги чува деталите за неговиот третман само во кругот на семејството, објавува „Мирор“.
Многу малку луѓе имале можност да го посетат, но се знае дека дури и по повеќе од 11 години по несреќата, тој сè уште има потреба од постојана грижа.
Прашан за моменталната состојба на Шумахер, Бријаторе за италијанскиот весник „Кориере дела Сера“ изјави: „Кога ги затворам очите, го гледам како се смее по победата. Подобро би се сеќавал на него како таков отколку да го гледам како лежи во кревет. Често разговарам со Корин“.
По несреќата, Шумахер помина 250 дена во медицински предизвикана кома пред да му биде дозволено да се врати дома и да продолжи со лекувањето. Иако информациите се оскудни, Корина сподели некои детали во документарецот на Нетфликс за Шумахер од 2021 година.
„Ми недостига Михаел секој ден. Но, не сум единствената што го сака. Им недостига на децата, на неговото семејство, на неговиот татко, на сите околу него. Сите го сакаат Михаел, но тој е тука. Тој е различен, но е тука, а тоа ни дава сила“, рече таа.
„Ние сме заедно. Живееме заедно дома. Одиме на терапија. Правиме сè што можеме за Михаел да биде подобар и да му биде удобно. И едноставно да го почувствуваме нашето семејство, нашата поврзаност. Многу ми е важно тој сè уште да може да ужива во својот приватен живот колку што е можно повеќе. Тој отсекогаш нè штител, а сега ние го штитиме него“, рече таа тогаш.
Жан Тод, кој беше шеф на тимот на Ферари кога Шумахер освои пет последователни светски титули, исто така ја посетува легендата на Ф1 по несреќата.
„Михаел е тука, па не ми недостига“, изјави Тод за „Л’Екип“ во 2023 година.
„Но, тој едноставно не е оној Михаел што беше порано. Тој е различен и за него прекрасно се грижат неговата сопруга и децата кои го штитат. Неговиот живот сега е различен и имам привилегија да споделувам моменти со него. Тоа е сè што може да се каже. За жал, судбината го погоди пред 10 години. Тој повеќе не е оној Михаел што го знаевме во Формула 1.“